اوفــــســــــــايد
افكار زملكاى ساخر
شريـف الشيتانـى
- مباراه الاهلى و الاوليمبى لم تذاع و مباراه الاهلى والمصرى هى اللى اتذاعت .. لسان حال جماهير الاهلى : ماكنتوا تزقوها شويه.
- اجوجو فاكر نفسه جاى يحترف فى شرم الشيخ وقاعد مريح .. حد يقوله ان وراه شغل وشغل كتير.
- لما الاهلى يهبط للدرجه التانيه او الزمالك ياخد الدورى وافريقيا السنه دى ممكن لاعيبه المصرى تنضرب فى بورسعيد... تبقى بشره خير.
- ما تخافشى يا جمال يا حمزه وحياتك هى ديتها انك تجيب جون الفوز فى ماتش اسيك والجمهور هينسى كل حاجه..اصل عيبه ان قلبه بلون فانلته.
- لا انخدع بتعادل الاسماعيلى او الزمالك او خساره الاهلى او فوزا المصرى فانا لا انخدع ببدايات الدورى " المصرى " فالموسم الماضى قدم المصرى امام الاهلى نفس الاداء الذى قدمه فى مباراه امس وصارع على الهبوط فى النهايه وفاز الاهلى بالدورى.
- الى جمهور الزمالك : بلاش تفرحوا قوى بهزيمه الاهلى وخفوا العيار شويه احسن كل ده ممكن يطلع عليكم.. اصل حسام حسن جايلكم بشلته يوم 24 .
- المصباح الوحيد الذى سلط على مصر الضوء فى اوليمبياد بكين هو الميداليه البرونزيه التى احرزها هشام مصباح فى لعبه الجودو.
- الى الكابتن محمود بكر : رغم حبى لك ولكن ركز شويه.. ده ماعرفشى ان محمد ابراهيم نزل نص ملعب وعبد الله اتنقل للناحيه اليمين غير بعديها بنص ساعه.
- لاول مره منذ حوالى خمس او ست سنين يكون الاعلام كله ضد الاهلى بسبب ممارساته الغريبه.. يبدو ان خارطه الدورى المصرى بدات تتغير.
- حسام حسن عمل اللى ما عملوش حد .. لعب مع الاهلى وفاز على الزمالك ولعب مع الزمالك وفاز على الاهلى ولعب مع المصرى والترسانه وجاب اجوان فى الاهلى والزمالك و كمان اتعارك مع كل الحكام.
- شوف تالق محمود سمير طب شوف ثقه علاء كمال واستنى بقى لما هانى سعيد يرجع للدفاع واتفرج على اجوجو وهو فى الهجوم ويا سلام بقى شيكابالا يرجع من الايقاف وجمال يتادب ويرجع تانى.. احلام " الزملكاوى " الطايش.
- الزمالك قال انه بيحتفظ من دلوقتى بحقوقه فى بث مبارياته على قناته اللى لسه ما اتعملتشى ...اصل للاسف بلدنا ماشيه بنظام حلق حوش واللى يصحى الصبح بدرى هو اللى يلحق.
- اتحاد جده يفاوض ميدو و فاوض من قبل محمد زيدان ومن قبل فاوضت فرق عربيه اخرى عمرو زكى وابو تريكه وحسنى احترف فى اهلى دبى..اتمنى من الاخوه العرب ان يبتعدوا قليلا عن اللاعبين المصريين وللاسف هم هدف سهل لهم بسبب قله الطموح لدى اللاعب المصرى واسالوا عبد ربه.
- جمال حمزه مرعب الكل..عصام عبد الفتاح خاف يطرده فى مباراه غزل المحله عشان الجماهير ممكن تقلب عليه وجه على الحيطه المايله وطرد ريكاردو وحتى الاتحاد المصرى وقف ريكاردو 3 مباريات و ساب حمزه رغم ان جماهير الزمالك و الجهاز الفنى متفقين على ان خطا جمال هو الاكبر.
- النادى الاهلى المفروض يصرف لمانويل جوزيه عسكرى مرور ويضيفه على العقد عشان يفسر لينا الاشارات اللى بيعملها بايده وبدراعه كل ماتش.
- معلشى جيت فى بالى كده مره واحده..بس غريبه اختفيت مره واحده ..يارب خير ولا ده الهدوء اللى قبل العاصفه ولا ربنا هداك..يا ترى حد فاهم حاجه؟
ليست هناك تعليقات:
إرسال تعليق
اتـــرك تــعــلــيــقــك