- هانى سعيد واخدها فتونه وعافيه وبيقول مش هنفذ قرار لجنه شئون اللاعبين واتحاد الكوره وهروح الفيفا ومش هلعب للزمالك ..العافيه مش بتجيب نتيجه؟ ..رغم انها مع عمرو زكى جابت نتيجه واهو راح يحترف زى ماكان عاوز.
- علاء صادق كان صادق لجماهير الزمالك بمقدار ذره..واهو ضيع الذره وشويه وهيضيع من مودرن .اصل شلبى قلب عليه.
- مرتضى منصور دايما يطلع فى البرامج بصور ومستندات واحكام قضائيه مش عارف بيجبها منين وعمرنا ماشفناه بيستفيد بيها فى حاجه ولا بيسجن بيها حد ولا بيطير بيها حد من على كرسى ..اظاهر انها للفرجه بس.
- خالد الغندور بيقول احمد حسن كلم هانى سعيد وعدل الاريال على النادى الاهلى وحسن بيقول ماحصلشى خالص وهرفع على الغندور قضيه وطبعا الاهلى هيقف مع احمد حسن.احسنلك ياخالد روح لمرتضى منصور هو اللى يقدر على الاهلى.
- بعد كل الكلام الفاضى بان الاهلى هيجيب شيكابالا من باوك,اتضح فى الاخر ان باوك مالوش حق ياخد اللاعب والزمالك الوحيد صاحب الحق فيه..الى النادى الاهلى : باوك ليس طرفا فى القضيه.
- عبد المنصف قال هانى واصحابه طلعوا عليا بسنج ومايه نار وهانى نفى ولا يوجد ادله..هل ممكن منصف يخاطر بتاريخه ويطلع كل ده كدب.. لا اتمنى وان كنت استشعر ذلك.
- تابعوا على القناه الثانيه غدا فى تمام الساعه الـ8 بث حصرى ومباشر للاعيبه الاهلى وهما بينططوا الكوره على رجليهم فى اطار معسكر الاهلى للاستعداد لمباراه الزمالك ...على فكره حرس الحدود اتغلب فى الكونفدراليه
- الزمالك معاه اوراق موقعه من حسين على ونادى بتروجيت بالموافقه على انتقاله للزمالك ..مهما عمل الزمالك لايمكن لاتحاد الكوره انه يوقف اللاعب , ده لسه مقررين ان هانى سعيد من حق الزمالك..الاتحاد هيقدر على الاهلى مرتين؟!..اشك
- مرتضى منصور عنده ملفات سوده لكل واحد فى مصر..طيب ما تدور لينا على ملف بيبدا بحرف الـ ح.
- بمجرد ان اعلن هانى سعيد عصيانه وعدم الانضمام للزمالك وجمهور الاهلى قاعد بيشتم فى حسن شحاته واخدوه عدو ليهم ومش فاهم ليه؟ رغم انهم كانوا بيدعوا ليه من 6 شهور..اظاهر دى شعره ساعه تروح وساعه تيجى.
- عمرو زكى : اديك ياسيدى عملت اللى انت عاوزه واحترفت بعد مازهقتنا وقرفتنا..ياريت بقى تفرحنا وتشرفنا ومايطلعشى كل ده على الفاضى وترجع بخفى ويجان.
- عمرو عادل: لازم تبقى لاعب جامد جدا ومالكشى حل وتحجز مكان اساسى ..غير كده الزمالك هيعانى الموسم اللى جاى من الدفاع الا اذا رجع هانى سعيد.. والعهده على الراوى.
- تأهل منتخب مصر للشباب الى الدور الثالث من التصفيات المؤهلة لكأس الامم الافريقية للشباب بعد فوزه على منتخب زيمبابوي فى هاراري وفاضله مباراه ويصعد لكاس الامم فى رواندا 2009 ..بزمتكم حد حس بيه؟ منك لله ياهانى ياسعيد.
- سيون ضحك على الاهلى فى الحضرى وضحك على الزمالك فى جيوفيرى سيرى ..نداء الى الاسماعيليه..خبوا على ابو جريشه.
ــــــــــــــــــــــــــــــــــــــــــــــــــــــــــــــــــــــــــــــ
كلامك حلو لكن تعمل ايه فى مجتمع كروى فاسد من لاعبين وانديه واتحاد الشربه والبزنس رجاء وجود الحل السليم ندور على المتعه ليس المال الله يخرب بيت مرتضى منصور يعورله ابنه كمان وكمان الله ينور ويعطيلك القدرة على الكتابه فى ظل هذا الفسادشكرا لك سيد الصعيدى
ردحذف